ഇതും എന്റ്റെയല്ല .... credits to my friend..
പിതൃപൂജ
അറിവുമോർമയുമുറയ്ക്കുന്നതിൻ മുൻപ്
കാൽവഴുതാതെ നടക്കാൻ പഠിച്ചതിൻ മുൻപ്
അക്കങ്ങളുമക്ഷരങ്ങളും കണ്ടതിനും മുൻപ്
ഇളതാം എൻ മനതാരിൽ മൊട്ടിട്ടതാണീ സ്നേഹം
തോളത്തെടുത്ത് താലോലിച്ചതും മമ --
മാറിൽ സുരക്ഷിത സ്ഥാനം തന്നതും
നാവിൽ പൊന്നിൻ കരണ്ടി തൊട്ടതും
ഇന്നലെയെന്നപോൽ ഓർക്കുന്നു ഞാൻ
ബലിഷ്ഠ കരങ്ങളാലെൻ കൈത്തണ്ട പിടിച്ചു
നടത്തിയ താതാ, അറിവിൻ ലോകത്തേക്കു
പിച്ചവയ്പിച്ച താവകപാണികൾ
തന്നെ ഇന്നുമെൻ സമ്പത്തും കരുത്തും.
പിന്തുടരുമെന്നും ഞാനാ കാലടിപാടുകൾ
ആ ജീവിതം തന്നെയെൻ പാഠപുസ്തകം
നല്കാം ഞാനെൻ ജീവനും ശ്വാസവും
അവിടുത്തെ സൗഖ്യജീവിതത്തിനായി
തമസിലെൻ മാർഗം തെളിച്ചു തന്നതും
ആത്മാവിൽ വിശ്വാസദീപം പകർന്നതും
അക്ഷൗഹിണികൾ ചുറ്റും നിരന്നപ്പോൾ
ധൈര്യം പകർന്നതും ആ വചസ്സുകളല്ലോ
മനസ്സിൽ വിങ്ങി നില്ക്കും നന്ദിയും
കരുതലും സ്നേഹവും പറയാൻ താതാ ,
അശക്തമീ ജിഹ്വ, അപര്യാപ്തമീ ഭാഷ
എന്നുമെന്നും മിഴികളിൽ നിറയുന്നു മമ രൂപം ചേതോഹരം
തണുപ്പിൻ കഞ്ചുകങ്ങൾ പുതച്ചു
ലോകമുറങ്ങുമ്പോൾ കുറിക്കുന്നു ഞാനെൻ ദക്ഷിണ
നീ തന്നെ , നീ തന്നെ നീ തന്നെ ജനകാ
ഈ ഭൂവിലെൻ സൗഭാഗ്യസുവർണതാരകം ..
Rony George Thottakkara
